Aktuelles

(Zeichnung KH Haaf)

Hoimetaberau,

isch des elend lang her, wo en dr Zeit zwische Aschermittwoch ond Oschtre des Faschte oins von de wichtigschte Theme gwese ond koi Dag vergange isch, wo net so Weisheite wie „Sechs Woche ohne“ (Alkohol, Zucker, Kaffee, Kuche ond älles andre, was guet schmeckt ond Spaß macht) auf älle Kanäl rauf- ond rondergspielt worde send. Was für obeschwerte Zeite send des doch gwese em Vrgleich zu de heutige, seufzget do dr Jomerschwob!

Em Wonderfitz  isch des domals freile zom oine Ohr nei ond zom andre naus ond er hot sei sündhaft teures Pilsgschwür rond oms Bauchnäbele immer weiter ghätschelt ond seine fünf Becher Kaffee am Dag für overzichtbare Lebensluscht ghalte.

Des hot so lang dauert, bis ihm sei homöosympathische Guru-Doktere endlich de Roscht ronderdoa hot, dass die ganze Globuli garnix nützet dätet, wenn er sich mit em Veschbre ond Trenke net a weng zammereiße dät. Ond sei Müdigkeit ond seine zittrige Händ seiet glasklare Stresssymptom, so ziemlich nah an me Birnaut! Jetz isch dr Wonderfitz aber ghörig gschockt gwese ond hot glei onderschriebe, dass mr ihn drei Woche en a Heilfaschtekur an de Bodesee schicke müsst. Des dät net bloß sein Birnaut net ausbreche lasse, sondern mit Krautwickelomschläg sogar seine heenige Hurgelesknui helfe.

Anfangs hot er wegem Koffeinentzug a mordsmäßigs Schädelwaih kriagt, aber wie nach re Woch mit immer weniger Vollwertkoscht des knallharte Faschte mit Tee ond Süpple ond Wasser, Wasser, Wasser gstartet isch, hot sich dr Wonderfitz bald wohlgfühlt wie a Vögele em Frühjohr. En dr Laufgruppe am Morge hot er‘s ganz fit ond fix von dr Schneck zur Rennsau brocht. Bloß des Spazieregange an dr Seepromenade hot er kaum ausghalte wege dene Knoblauch- ond Kräutergerüch aus de italienische Küche oder dene Schwarzwälder Kirschtorte en de Cafés. Aber weil die Hongerkur halt so sauteuer gwese isch ond d Kass kaum was dran zahlt hot, hot dr Schwob em Wonderfitz durchghalte bis zom End.

Koi Mensch, wo des net selber mitgmacht hot, kann sich vorstelle, wie des erschte feschte Nahrongsmittel noch zehn Däg Hongerleide gschmeckt hot. Sellen ogspritzte Bio-Bodeseeapfel wird dr Wonderfitz seiner Lebdag net vergesse ond vor allem net des feierliche Ritual, wie er die Paradiesfrucht mit seim Taschemesser  gschnitzelt ond a halbe Stond lang kauend auf dr Zong hot zergange lasse.

Wieder drhoim send viele besorgt gwese, weil er so mägerle oder gar krank aussehe dät. Drom hot er mit Fleiß wieder a paar Kilo zuglegt, aber älles mit dene gsonde Rezept von dem millionemäßig guete Vollwertkoch von dr Überlinger Faschteklink, wo mindeschtens an Michelin-Stern verdient hätt,

moint

dr Wonderfitz